احداث القصة
قصة سفيان وأخيه عن العدل
النهاردة سُفيان بيفتح التلاجة لقى اناناساية صغيرة، قولت له دي مش بتاعتك لوحدك اقسمها إنتَ وأخوك حمزة قال لي ماشي بعدها بشوية لاقيتهم الاتنين جايين واقفين قدامي وحمزة بيقول لي بصي يا ماما صلي على سيدنا محمد قولت له عليه الصلاة والسلام راحوا قايلين عليه الصلاة والسلام بعدها حمزة كمل كلامه بصي يا ماما إنتِ عارفة سورة المطففين قولت له ايوه يا حمزة قال لي عارفة المطففين يعني إيه؟! قولت له يعني الناس اللي بتغش في الميزان، قال لي ايوه صح اللَّه ينور بصي بقى ابنك سُفيان ده أصلًا من المطففين عشان حضرتك قولتِ له اقسم الاناناسة بينك وبين أخوك راح هو واخد الحتة الكبيرة وعطاني الحتة الصغيرة..
بصيت لسُفيان لاقيته باصص في الأرض بيعد البلاط باين قولت له إيه رأيك في الكلام ده يا سُفيان؟ قال لي بصراحة أنا عملت كده، قولت له طيب تمام من يوم ورايح بقى إنتَ المسئول عن تقسيم الأكل وعايزة حد يجي يشتكي لي في البيت ويقول لي سُفيان بياخد أكتر مننا لنفسه، وقتها بقى حضرتك هتتعاقب عقاب بالأغلبية كلنا هنصوت ونختار عقاب ننفذه على حضرتك وهنعلق ورقة على خشبة سريرك مكتوب عليها سُفيان الغشاش اللي بياكل حقوق الناس، لكن لو نجحت في المهمة دي وكل الناس بقت تشكر لي في عدلك والتقسيمة بتاعتك هنعلق ورقة كبيرة مكتوب عليها سُفيان العادل اللي بيعطي للناس حقوقهم ونجمع مننا كلنا ونشتري لك هدية، هاا إيه رأيك موافق؟!
بص لأخوه وبص لي تاني وراح قال لي اممممم ماشي هعمل كده لمدة كم يوم؟!
قولت له اسبوعين، قعد يفكر شوية وبص لي وبيعد على صوابع إيده، وراح قال لي ١٤ يوم! قولت له أيوه، قال لي كتير، قولت له لأ مش كتير أنا كنت هخليه شهر عشان تتعود تظبط إيدك بعد كده، قال لي خلاص اسبوعين حلوين، قولت له ماشي يلا اعتذر لأخوك واستسمحه عشان الجزء اللي إنتَ اكلته من حقه، راح باس دماغ أخوه وقال له حقك عليَّ يا حمزة أنا أسف أنا معايا شوكولاته من اللي إنتَ بتحبها تاخد حتة بدل جزء الاناناس اللي أنا اكلته من حقك؟ راح حمزة قعد يفكر شوية وقال له ماشي سامحتك وقبلت اعتذارك هات الشوكولاته يلا.
للمزيد من الحكايات المفيدة يمكنكم تصفح: قصص أطفال اذا اعجبتك القصه قم بابداء اعجابك بتعليق ,وانتظرونا فى قصه جديدة وحكايه جديدة مع موقع قصص وحكايات كل يوم .